आधुनिक युगमा राष्ट्र निर्माणको मुख्य आधार शिक्षा नै हो। त्यसै क्रममा, प्राविधिक तथा व्यावसायिक शिक्षा एवं तालीम ९टिभेट० ले नयाँ युगको आवश्यकता र रोजगारीको मागलाई पूरा गर्ने क्षमता राख्छ। यही आवश्यकता र अवसरलाई मध्यनजर राख्दै, टिभेट टाइम्सले आजदेखि परिक्षण प्रकाशनकारुपमा आफ्नो अनलाइन यात्रा सुरु गर्दैछ।

टिभेट टाइम्स नेटवर्क प्रा. लि. द्वारा संचालित यो पोर्टल केवल समाचार, विचार र विमर्शहरुमा मात्र सीमित नरही, प्राविधिक तथा व्यावसायिक शिक्षाको क्षेत्रमा एउटा अभियान को रूपमा क्रियाशिल हुनेछ। हाम्रो मुख्य उद्देश्य यस क्षेत्रलाई प्रवद्र्धन, शुद्धीकरण र सशक्तिकरण गर्नु हो।

विगत लामो समयदेखि यसै क्षेत्रमा काम गर्दै आएको अनुभवी टिमद्धारा टिभेट टाइम्स संचालन हुँदैछ । हामी वेबसाइट, फेसबुक, युट्युब, टिकटक, इन्स्टाग्राम, लिंकडिन, ट्विटर लगायत सबै प्रमुख सामाजिक सञ्जाल मार्फत समाचार, लेख, जानकारी, संघर्ष र सफलताका कथा देखि नीति निर्माण तथा कार्यान्वयनका लागि विचार विमर्श, बहस, छलफल र अन्तरक्रिया सँगै प्रवर्द्धनात्मक सामग्रीहरु उत्पादन तथा प्रकाशन गर्नेछौं।

नेपालमा टिभेट क्षेत्रको महत्त्वप्रति सबैको ध्यान आकर्षित गराउनु जरुरी छ। छोटो अवधिको सिपमूलक तालीमदेखि लिएर प्रिडिप्लोमा, डिप्लोमा तथा प्रमाणपत्र, स्नातक, स्नातकोत्तर हुँदै पिएचडी सम्मका कार्यक्रमहरूको विस्तृत योगदान र यसबाट आउने आर्थिक र सामाजिक परिवर्तनलाई व्यापक रूपमा बुझ्न र बुझाउन यो माध्यम प्रभावकारी हुनेछ भन्ने हाम्रो विश्वास छ ।

यो क्षेत्रमा ठूलो आर्थिक लगानी छ, र हरेक वर्ष यहाँबाट हजारौं सिपयुक्त युवा जनशक्ति तयार भई राष्ट्रिय तथा अन्तर्राष्ट्रिय श्रम बजारमा सफल भइरहेका छन्। तै पनि, टिभेट सम्बन्धी जनचेतना र सकारात्मक वातावरण अझै पर्याप्त छैन। ससाना नीतिगत र व्यवहारिक चुनौतीका कारण यसक्षेत्रको अथाह सम्भावना ओझेलमा परेको छ ।

त्यसैले, हामी सबै राष्ट्रिय तथा अन्तर्राष्ट्रिय सरोकारवाला निकायहरूसँग सहकार्य गर्दै, निष्पक्ष, पारदर्शी र प्रभावकारीरूपमा यस क्षेत्रको विकासमा योगदान पुर्याउन प्रतिवद्ध छौं।

टिभेट टाइम्स यस क्षेत्रको आवाज बन्दै यसको गतिविधिहरू प्रकाशमा ल्याउने, र देशभरिका युवा, अभिभावक, शिक्षक, प्रशिक्षक, शिक्षालय संचालक र नीति निर्माताहरूलाई सूचनामूलक, शैक्षिक र प्रेरणादायी सामग्री प्रदान गर्नेछ। सरोकारवाला सबै पक्षबाट साथ, सहयोग र सुझाव सल्लाहको अपेक्षा सहित, धन्यवाद ।

प्रकाशकीय

टिभेट टाइम्स नेटवर्क