सुन चाँदी तथा रत्न पत्थर पहिचान सम्बन्धी तालिम हुँदै
२०५९ साल फागुन ३० गते देखि नेपाल सुनचाँदी व्यवसायी संघ, केन्द्रीय कार्यालय अन्तर्गत नेगोसिडा प्रशिक्षण केन्द्रको स्थापना भई तालिम कार्यक्रमहरु संचालन भईरहेकोे छ ।
तालिम प्रदान गर्दा आईपर्ने विभिन्न किसिमका प्रशासनिक अप्ठ्याराहरु, नीति निर्माण तथा अन्य समस्याहरुको तत्काल समाधान गर्न सहज होस् भनी नेपाल सुनचाँदी व्यवसायी संघ, काठमाडौं सुनचाँदी व्यवसायी संघ तथा नेपाल गोल्ड सिल्भर ट्रेनिङ्ग प्रमोसन सेन्टरबाट अख्तियार प्राप्त दक्ष व्यक्तित्वहरुको प्रतिनिधि रहेको बिशेष अधिकार प्राप्त स्वायत्त प्रशिक्षण समितिको समेत गठन गरी कार्य सम्पन्न भईरहेकोछ ।
यस प्रशिक्षण केन्द्रको स्थापना संगै देशमा भएको विभिन्न प्राकृतिक तथा राजनैतिक परिवर्तन तथा विश्व भर फैलिएको Covid-19 को महामारीले गर्दा सुनचाँदी व्यवसाय र समग्र बजारमा कालिगढ अभाव सम्बन्धी देखिएको समस्या न्यूनिकरण गर्ने प्रयास स्वरुप नेगोसिडा तालिम केन्द्रले सुनचाँदी कालिगढ र व्यवसायीहरुको सीप विकासको लागि नेपाल सरकारको मान्यता प्राप्त प्राविधिक शिक्षा तथा व्यावसायिक तालिम परिषद् (CTEVT) को ८९० घण्टाको पाठ्यक्रम र राष्ट्रिय व्यावसायिक प्रशिक्षण प्रतिष्ठान (NAVT) को ३९० घण्टाको छोटो अवधिको पाठ्यक्रम तयार गरी LEVEL -1 का कक्षाहरु तथा रत्न पत्थर पहिचान सम्बन्धी कक्षाहरु पनि संचालन गरिरहेको छ ।
यस तालिमबाट प्रत्यक्ष अप्रत्यक्ष रुपमा नेपालमा सुनचाँदीका गरगहना बनाउने कालिगढहरु दक्ष र निपुर्ण हुने र वार्षिक रुपमा विदेशमा न्युन पारिश्रमिकमा गइरहेको नेपाली कामदारहरुलाई केही मात्रामा भए पनि स्वदेशमै रोजगार उपलब्ध गराउने मुख्य उद्देश्य लिइउको छ । साथै विदेशमा काम गर्न जाने युवाहरुलाई पनि तालिम लिए पश्चात प्राप्त हुने दक्षताको प्रमाणपत्रको आधारमा राम्रा अवसरहरु पाउने अपेक्षा गरिएको छ ।
त्यस्तै प्रशिक्षक र प्रशिक्षार्थीहरुको तथ्याङ्कहरु संकलन गरी सुरक्षित राखिएको छ । यसबाट संभावित रोजगारीको अवसरको लाभ लिने गरी संस्थागत पहल भइरहेको छ । CTEVT र NAVT बाट आवश्यक सहयोग प्राप्त भै हालै मात्र CTEVT अन्तर्गत Skill Test Assessor Trainer का रुपमा सुनचाँदी मुल्यांकनकर्ताहरु चार जना, नेपाल कै पहिलो सुनचाँदी सम्बन्धी पाठ्यक्रम निर्माण गर्ने बिशेषज्ञका रुपमा दुई जना र प्रशिक्षक प्रशिक्षण तालिम (TOT) दुई जनाले प्राप्त गरी प्रमाण पत्र लिई सकेको छ ।
कक्षा संचालन गर्नका लागि कागोसिडा (NGS-TPC) प्रशिक्षण भवनमा सुनचाँदी सम्बन्धी प्रशिक्षण कक्षा कोठाहरु, प्रयोगशाला, स्वागत कक्ष, प्राध्यापक कक्ष, प्रयोगात्मक कक्ष, बैंठक कक्ष, पाहुना कक्ष, चमेना गृह लगायत सम्पुर्ण भौतिक पूर्वाधारहरु निर्माण सम्पन्न भइसकेको छ ।
सुनचाँदी तथा रत्न पत्थर प्रशिक्षण कार्यको लागि राष्ट्रिय र अन्तर्राष्ट्रिय सम्बन्ध स्थापित गरी स्वदेशी वा विदेशी विज्ञहरुलाई प्रशिक्षण केन्द्रको भवनमा आवास गृहको सुविधा सहित प्रशिक्षण कार्यक्रम संचालन गर्ने उदेश्य रहेको छ । साथै सुनचाँदी र रत्न पत्थर सम्बन्धी तालिमका लागि चाहिने अत्याधुनिक परिक्षण गर्ने मेशिनहरु सरकारी स्तरको अनुदान सहयोग वा आफ्नै सहयोगी संस्थाहरुको अनुदान सहयोगबाट प्राप्त गरि प्रशिक्षण कार्यलाई अगाडी बढाईरहेको छ ।
काठमाडौं उपत्यकाको एउटा अविकसित, बेरोजगार र कमजोर आर्थिक अवस्था भएको एक आधार सुनचाँदी कालिगढ, सुपरभाईजर उत्पादन गाउँ पहिचान गरी उक्त पालिकासँग समन्वय र जमानत प्राप्त गरी युवा प्रशिक्षार्थीहरु छनौट गरी पहिलो चरणमा उक्त प्रशिक्षण आधार क्षेत्रबाट बेरोजगार युवाहरुको सहभागितामा सुनचाँदी र रत्न पत्थरको अभिमुखिकरण कक्षाहरु संचालन गरिरहेको छ ।
हाल संस्थाले कागोसिडा, (NGS-TPC) प्रशिक्षण भवन, कामपा–२५, कुसुमबियालाछी, ठँहिटी, काठमाडौंबाट सुन जाँचकी तथा बहुमुल्य रत्न पत्थर पहिचान सम्बन्धी तालिमहरु संचालन गरिरहेको छ । इच्छुक प्रशिक्षार्थीहरुले संस्थाको कार्यालय वा आधिकारीक वेबसाइत www.negosida.org मा रहेको तालिम सम्बन्धी फाराम भरी उपलब्ध गराई दिन समेत अनुरोध गरेको छ । दुइ हप्ते तालिमका लागि रु.२५ हजार तथा सुरक्षण जमानत बापत रु.१० हजार गरी जम्मा ३५ हजार भुक्तानी गरी सहभागी हुन सकिनेछ । तालिम पश्चात सुरक्षण जमानत बापत खाखिएको रु.१० हजार फिर्ता गरिनेछ ।
प्रशिक्षण तालिममा सहभागी हुने सदस्य व्यवसायीहरुलाई बिशेष प्राथमिकता दिइनेछ । महिला प्रशिक्षर्थीहरुलाई २० प्रतिशत तथा अपाङ्गता भएका प्रशिक्षार्थीहरुलाई ५० प्रतिशत छुटको व्यवस्था रहेको छ । प्रशिक्षण पश्चात प्रशिक्षार्थीहरुलाई रोजगारको अवसर पनि प्रदान गर्न सकिने नेगनेसिडाका अध्यक्ष महेन्द्र रत्न शाक्यले बताउनुभयो ।
प्रशिक्षण कार्यक्रम सम्बन्धी थप जानकारी लागि संस्थाका वरिष्ठ प्रशासक हेबेन्द्र शाक्य वा कार्यालय सचिव हरि शरण मगर लाई फोन नं. ०१–५९१४६८८, ०१–५९१९५६६, ९७६३६९३३४४ मा सम्पर्क गरी थप जानकारी प्राप्त गर्न सकिने छ ।
सुनचाँदी र रत्न पत्थर सम्बन्धी बिशेष तथ्याङ्क संकलन गरी स्वदेश तथा विदेशमा रोजगारको अवसरको लागि बिशेष पहल गरिने संस्थाको योजना रहेको छ ।
सेयर गर्नुहोस्:
